觀眾為咩睇戲?觀眾睇戲為咩?──《賭城風雲2》影評

賀歲電影《賭城風雲2》票房唔錯,但就有網民留言狂鬧,其中留言多數係圍繞套戲政治化,例如:「一世都唔會睇『舐共晶』拍嘅戲!」;有個又話:「王晶撐中共,一定罷睇《賭城2》!」。其實真係痴痴哋,睇戲啫!原來而家唔係要求套戲好唔好睇,而係仲要計算埋製作人嘅政治取向。或者不久將來,呢班咁有政治立場嘅網民去茶餐廳食個餐蛋麵嘅時候,都要問吓個廚師嘅政治取向。如果個廚師係支持中共嘅話,記得大大聲同佢講:「你舐共!我唔_食你碗面!」幾有型呀!

你拍到好戲,其實我真係唔理你舐乜,我都會入場睇!

其實電影係團體工業,導演一個人無可能完成到一套電影,過程中要好多專業幕後人員配合。如果只係為咗某個人嘅政治取向,而抹殺咗一班人嘅心血,又或者放棄咗一個可能欣賞到一套好電影嘅機會的話,筆者真係覺得有啲不智。當然,作為觀眾絕對有權力批評電影嘅好壞啦,仲可以根據導演往績嚟決定入唔入場睇套戲。不過,千祈唔好未睇先閙,舉個例子︰你入馬場買馬,你可以根據練馬師嘅往績嚟買馬,但係你唔會因為個練馬師「舐共」所以唔買佢隻馬。好多時雖然練馬師嘅往績比較差,但係正所謂「99倍冷馬都有可能會跑出」,如果你又無買隻馬,人哋跑出咗就係咁閙,咁你真係要去睇吓心理醫生。所以睇戲可以鬧,但首要條件係:「睇咗先講啦!」

平心而論,《賭城風雲2》絕對比上年套《賭城風雲》好睇。

上集演員衣著造型核突肉酸,連有型人士發哥都俾佢整到極唔順眼(居然夠膽叫發哥著嗰套縮水西裝加吊腳褲),真係核突一絕。但係今集就有明顯改善,發哥回復有型瀟灑,衣著稱身好睇。另一主角張家輝都造型突出,其他各演員也身光頸靚。佈景美術方面簡潔亮麗,感覺上花咗唔少心思。再加上遊艇同泰國嗰幾個場口,令到套片出到當年「逢賀歲片必大製作!」嘅感覺。

再講配音上都有極大進步,筆者睇嘅係廣東話版本。記得上集配到好似業餘習作咁。好多時聲音、語氣和畫面都夾唔到,一係聲快畫慢、一係聲慢畫快。今集配音就完全舒服晒,發哥同張家輝配得生鬼非常。另外一啲吉鏡過場位配上搞笑對白,令到電影嘅節奏感加快。再加上用配聲嚟改善畫面上嘅小犯駁,呢種做法喺80年代嘅港產片經常可見。當配音員見到劇情或畫面出現小問題時,喺導演同意之下,佢哋會改動對白令到劇情或畫面合理化。後來流行咗現場收音,已經好耐未欣賞過咁好嘅配音室製作。另外用上一個機器人來演出儍強一角,感覺上唔比杜汶澤差。觀眾完全真心笑出嚟,但成本就差天共地喇。

最後再一讚嘅今次係減少咗合拍味道。上一集好明顯為咗遷就大陸市場,成日去估國內口味。令到好多場口劇情犯駁加戇居,最後結果係港產片唔似港產片。今集經過多年合拍經驗,終於搵到方向,拍出一啲當年雄霸亞洲嘅港產片感覺。雖然仲可以睇到有些位係為咗遷就大陸市場而落墨,但係都無影響整體嘅完整性,所以尚算可以接受。

當然,《賭城風雲2》唔係完美嘅,筆者就好唔鐘意發哥打拳嗰場戲。原因好簡單,打個比喻:喺荷理活男星中,辛康納利(Sean Connery)算又老又型,但係你唔會見到辛康納利喺電影裡面除晒衫打拳。因為人老左就一定會皺皮,做乜要自暴其短?

其實發哥喺《賭城風雲2》裡面有意無意間,將自己主演嘅角色「石一堅」定位在永遠比唔上「賭神高進」嘅角色設定之上,可見製作班底和演員仲未有信心超越從前嘅成就。然而電影最強嘅高潮位居然係刀仔同賭神出場,大笑之後嗰種光輝不再嘅感覺,真係令人有啲唏噓。

歲月催人呀!還我發哥呀!

P.S. 另外,筆者都睇咗《衝上雲霄》,感覺唔係網上講到咁爛。靚人、靚景、靚攝影,係劇情有啲散同老套,不過絕對比《12金鴨》出色。

Leave a Reply

Your email address will not be published. Required fields are marked *

*