映畫手民 Cinezen
做雞掂唔代表做鴨得！
上網睇到觀眾們對《衝上雲霄》嘅劣評，再睇埋鄒凱光編劇兼導演居然回應：「好！但部片我真係唔覺得爛，或者咩人睇咩戲啦。」原來又係一個只接受成功，唔肯接受批評嘅製作人。
睇到有啲火，即係照呀鄒生嘅講法：「如果睇鄒導演嘅戲又覺得爛嘅話，咁你就好大可能或者係一個爛人。」所以筆者唔敢去睇《衝上雲霄》，揀左《12金鴨》黎睇。
點知都係避唔到，証實咗我本人係一個爛人！
挾住上年賀歲片《金雞SSS》嘅成功，原班人馬再接再厲，諗住點都唔會中伏卦！點知就真係「估你唔到，差到離曬大譜！」。有朋友仲幫手撐話：「賀歲片得啖笑就得啦！新年係咁㗎啦！」咁係唔係代表一年只係得過年嗰幾日至可以睇呢套戲先？如果過完年先去睇嘅話，就係你唔啱同笨實先？咁嘅理由都噏得出，唔怪得香港電影咁沒落。
其實上年套《金雞SSS》真係唔差，用笑聲帶出香港嘅轉變，笑中又有少少窩心位。各演員又表現出色，其中王菀之非常突出，令人印象深刻。但係到左今年，唔知係唔係鄒生比較忙，一個賀歲擋有兩套戲上，所以顧到頭又顧唔到腳。如果呢套唔係賀歲片，《12金鴨》可以話係垃圾！
成套戲都係建築喺錯誤當中，第一個錯誤係唔知做乜叫《12金鴨》，筆者真係數唔到邊到有12隻鴨？戲裡成班失敗鴨大聯盟，唔知金乜嘢鴨？唔通係話被人打鑊「甘」？
第二個錯誤係安排吳君如反串。本來吳君如係一個好演員，搞笑更加係高手中嘅高手。點知道今次會安排佢反串扮演美男子，重要係男女都會一見傾心嗰隻。等如叫吳君如綁住雙手去打交。除咗開始出場30秒有點驚喜，跟著演出真係吃力不討好到令觀眾討厭！
第三個錯誤係完全唔去描寫人物性格。每一個配角出場都唔知想點，姜皓文、蔡瀚億出場已經無厘頭啦！最無厘頭係劉浩龍，明明出場話做金融，點知突然做鴨……
喺《金雞SSS》裡面表現突出嘅王宛之同黃偉文，喺《12金鴨》裡面完全無得發揮。套戲好似想拍到80年代精裝追女仔系列咁，永遠用三配角夾一主角。但係導演都要俾位演員先得㗎！姜皓文、蔡瀚億、劉浩龍、變左三塊活動佈景板，再加上綁手君如姐，成套片真係流水行雲般，因為睇完真係立刻無乜印象！
第四個錯誤要數到太多客串明星，雖然筆者明白君如姐相識滿天下，一吹雞就大把星幫手，但係都要設計吓出嚟嘅後果同效果㗎？而家雖然有容祖兒、謝霆鋒客串，但出嚟嘅後果係劇情散亂、效果係變成好似以前TVB台慶搞笑短劇咁。一味明星多多，胡鬧一通。無記台慶短劇十幾分鐘爆肚搞笑觀眾可以接受，但係放落電影到搞足個半鐘你都咪話唔惡頂！其實谷德昭套《龍咁威》都係胡鬧一通，搞個半鐘笑，不過搞完起碼笑到反肚，你起碼記得咩叫「瑞士山區肺」 、記得「佢當年手吊環好勁，又鍾意食李記鹵味」；而家最大問題係一大班人（仲要係明星）出嚟，而且佢地無戲做，漫無目的咁行行企企，咁又一套戲。
記得以前有幸參觀過一次專俾視障人士睇嘅「口述電影」放映會，為咗令視障人士都可以「睇戲」，大會安排義工做「口述影像」，即係將畫面上面嘅細節喺演員對白之間加插解釋。當日義工仲係盧覓雪小姐，播放嘅電影係《金雞SSS》，完整嘅故事加上盧小姐嘅解説，令到一班視障人士亦能投入電影，雖然唔係新年期間，但係完場嘅時候都贏得熱烈嘅掌聲……真係盲嘅都「睇」到拍手掌！所以證明好嘅電影絕對無時間性。筆者覺得如果之後到《12金鴨》有口述服務嘅話，我諗義工們就算視覺無問題都好難去解說劇情……因為真係有眼都睇到一頭煙！
* 文題為編輯所擬
