映畫手民 Cinezen
老婆大人提出一條問題：「你寫乜鬼愛情電影？人哋叫『言情電影』呀！」其實筆者認為，「愛情電影」同「言情電影」係有小小分別嘅。「言情電影」純粹描寫男女關係兜兜轉轉、浮沉於幻得幻失之間。而「愛情電影」就會加入其它元素，只要大橋係以愛情為主就可以，所以好多時侯同其它片種嘅分界變得矇糊。但係無所謂，因為重點永遠都係套戲好睇就得喇！
其實筆者年輕時都係愛情電影嘅粉絲。不過就有一個幾奇怪嘅偏好，就係鍾意睇悲劇。最好結局仲係陰陽分隔，慘到無倫。如果計埋以前嘅港產片，筆者首選電影一定係林嶺東導演、譚詠麟主演嘅《陰陽錯》！好多人列佢入恐怖片系列，但筆者絕對覺得呢部係愛情片。人鬼戀做主線，到最後仲要打到隻女鬼魂飛魄散，再塞番個八婆女朋友俾你過世，呢下真係寧願魂飛魄散嗰個係自己。
其實當年譚詠麟仲主演咗唔少愛情片，好似《君子好逑》，《花仔多情》……一直去到《用愛捉伊人》同《雙城故事》，睇落都幾多，但係點都好似唔夠經典。論到經典，大家一定記得《新不了情》。一個失意音樂人劉青雲，鍾意咗個身患绝症嘅女仔袁詠儀，又浪漫又慘情，當年好多觀眾睇到喊唔停。再數落去要數到陳可辛導演嘅《金枝玉葉》，男女性別錯摸嘅愛情故事，説穿咗其實只不過係《梁祝》現代版，最大分別都不過係有個Happy Ending。仲有數唔完咁多佳作，一次講唔晒。
到2000年，杜琪峯同埋韋家輝拍左一部由劉德華、鄭秀文主演嘅《孤男寡女》。用都市辦公室男女關係，拍出一部富香港都市現代感嘅愛情喜劇，可以堪稱為另一經典。
跟著杜、韋二人再沿用兩位演員拍出《瘦身男女》，綽頭係取材於城市熱話──「減肥熱」。到了2002年，有鄭秀文同劉青雲主演嘅《我左眼見到鬼》，雖然錯摸玩到見鬼咁誇張，但係到最後穿橋一刻就真係非常窩心。再下一城嘅有2003年賀歲電影《百年好合》（鄭秀文、古天樂），呢套戲睇到古天樂嘅喜劇感。市場上又靚仔又會演喜劇嘅唔多，古生絕對可以同梁朝偉一鬥。同年杜、韋二人改編插畫家幾米嘅書拍出《向左走．向右走》，由金城武加梁詠琪主演，劇情將緣份、錯摸，浪漫地提升到另一境界。杜、韋二人當年真是令人驚喜不斷，之後兩人開始減少合作，再出擊應該係2011年嘅《單身男女》（Don’t Go Breaking My Heart）。
筆者記得睇完呢套戲後，「回塘」呢兩個字不斷喺腦海裡面浮現！雖然套戲唔可以話好差，但係都稱唔上係好！古天樂、高圓圓、吳彥祖，兩男一女加埋等於得個「嬲」字。戲裡面既三角關係唔吸引，古天樂痴心得黎但係又控製唔到對其他女性既渴求；吳彦祖專一得黎但係溝女既橋明顯又低古天樂幾班，最慘係唔明高圓圓有咩咁值得呢兩個男人死命咁追？雖然戀愛鬥爭場地由辦公室進化到大廈既玻璃幕牆。可惜感人場面去得唔夠盡。例如古天樂同高圓圓表白嗰場戲：古用手機播出以前偷拍高圓圓既片段，跟著同高講其實鍾意咗佢好耐，點知一班性感女郎突然係古天樂面前出現，古天樂鼻血直噴，高圓圓嬲到立刻走人。本來浪漫完攪笑係幾好，但係整場戲節奏太快，令到力位去咗噴鼻血度，浪漫感覺瞬即大減。另外古天樂「書裡藏戒子」條橋雖然好正，筆者睇既時候都有點感動。點知結局高圓圓揀咗吳彥祖，攪到之前既鋪排好既嘢好似突然間無曬方向。最後雖然有好多女性觀眾都大讚結局，覺得揀個穩陣既，點都好過揀個花心既，但係筆者始終覺得睇完個Ending之後好唔舒服。
後來，杜、韋二人製作咗古天樂、鄭秀文主演既《高海拔之戀2》，筆者睇完之後無咩詳細印象，只係記得腦裡響起過四個字：「回忍晒塘！」。到左2014年，杜、韋二人推出《單身男女2》（Don’t Go Breaking My Heart 2），講真，睇之前筆者真係有少少「拗底」，上集都唔係咁吸引，仲拍下集？唔係回磄回到咁呀？會唔會悶爆㗎！？
點知，睇完真係要拍手掌！
韋家輝既無敵編劇手法返晒黎，恨恨地將喺第一集裡面建立既角色關係徹底顛覆，感覺就好似睇完當年韋生喺無記拍既經典劇集《大時代》，再立刻睇韋生喺亞記拍既《世紀之戰》咁。上、下兩集角色關係完全逆轉，古天樂雖然表面花心，但內裡卻痴情到極點；上集決絕下嫁吳彥祖既高圓圓原來內裡重係心大心細既，到咗結婚嗰日再黎個誇爆搶親。頂！搞到支持上集班穩陣派既女人小聲四起，但筆者絕對支持，起碼夠膽夠癲！仲有今集用咗上集唔起眼既劇情，超級浪漫！其中有段講到古天樂不斷失眠，惟有一次又一次爬水渠上去高圓圓既舊居，將當日偷拍高圓圓既片段重播又重播，睇完先至瞓到。如果觀眾對第一集印象唔深既話，必定立刻搵出黎重溫。
不過《單身男女2》都有敗筆之處，唔知係唔係因為要計算市場需要，所以加入楊千嬅同周渝民，搞到套戲有啲亂。如果呢個篇幅描寫加返落古天樂同高圓圓身上，應該會立體好多。最後睇完《單身男女2》既總結：杜生、韋生，唔再回塘喇！如果佢哋可以放開對商業上面既期望，必定可以再俾更多驚喜觀眾，繼續沙膽繼續癲！
