映畫手民 Cinezen
滿懷希望去睇《親愛的，原來是你》（Love, Rosie），呢套片吸引我嘅原因唔係改編自P.S. I Love You原著小說作家Cecelia Ahern 嘅作品; 而係嗰個老套到爆嘅故事大綱：「男女之唔可能有純友誼？一上過床就會無朋友做？」其實呢個問題，由盤古初開到而家都仲不停喺男女關係中重演。就算自己無試過，身邊梗會有朋友中過招，好似「契哥契妹契上床」、「我哋之間只係好兄弟」、「我只當佢係阿妹」乜乜乜……呢種故事真係多過7-11。
喺筆者後生嗰時，已經有一套同樣橋段嘅作品──《不朽真情》（Reality Bites）。回頭一望已經係20年前嘅作品，不過絕對好睇過《親愛的，原來是你》！原因好簡單：因為「簡單而浪漫」。電影好大部分嘅功用係用嚟娛樂，俾幻想空間觀眾，逃避現實又好，投入感動又好。雖然知道咁美好嘅愛情故事好難發生喺自己身上，但係本著「遇唔到睇下都開心」嘅原則之下，睇愛情電影對筆者來講絕對係一種享受。啱啱彭浩翔導演嗰套《撒嬌女人最好命》其實都係用呢條大橋。不過老套還老套，呢味嘢永遠有佢迷人嘅地方。用嚟做電影橋段嘅話，真係好易令人產生共鳴，如果閣下中過招嘅話，咁一睇就入晒局。
但係睇完《親愛的，原來是你》之後，真係失望X無限。唔該！筆者係想睇一部浪浪漫漫嘅愛情電影。頂！點解會變咗睇一套真實得嚟又殘忍嘅電影！入面對男女主角仲要性格悶爆兼低能！或者因為筆者年紀有番咁上下，真係接受唔到宜家嘅浪漫觀念。
其實套戲一開始有嗰種「只係朋友」嘅青澀感覺，但跟著就係少年無知、亂攪男女關係，之後女主角有左，無乜考慮就任性地生左就算。當筆者以為劇情發展咁快，將來男女主角重逢應該會有好多感動位，點知咩嘢都無！
頂！劇情咁就橫跨左十幾年，男女主角已經人到中年，但係喺劇情描寫或外貌上絕對見唔到佢哋有成熟過。剪下個髮型就當老咗，其實無化老妝都未算攞命，最攞命係男女主角嘅演技，係統一地差！用個幼稚眼神演中年人角色，完全感覺唔到佢哋有用心去演繹自己個角色。
所謂物以類聚，導演喺處理劇情分場嘅時候，就更幼稚過演員嘅眼神，時空鍾意就跳幾年，但係又唔係為咗推進故事。故事描寫男女主角嘅另一半都各自出軌，本來係可以加強男女主角「最後在一起」嘅浪漫感覺，但係當時空跳得太快，演員又演唔到歲月流逝嘅感覺，咁就變左而家咁：「一班無腦又成日性衝動嘅人走埋一齊。」小喇叭！咁點浪漫呀大佬！
成套戲根本就視婚姻制度如無物，男主角呢頭結婚，嗰頭就離婚。唔好話筆者重視婚姻老套，話說經典愛情電影《真的戀愛了》（Love Actually）裡面有一場戲，老友同自己暗戀嘅對象結婚，自己在婚禮當日盡力幫忙後本來想將秘密永藏心，但偶然間被已成老友太太嘅暗戀情人發現心意。最後喺老友家門口用圖畫表達愛意後瀟灑離開，絕對沒有「搶親、勾引」等富爭議性嘅激烈場面，但就浪漫到超曬班。
其實愛情電影真係簡單加浪漫就得，千祈唔好拍到太現實。只要拍出嗰種「離離合合、患得患失」嘅感覺，咁就算喺成功。用番《不朽真情》做例子：「靚仔靚女、一段三角關係、選擇好朋友定有錢佬？」簡單得嚟劇節又細緻，再加入大量好聽配樂，就咁就過咗20年再攞番出黎都仲覺得好睇。拍咁寫實把鬼咩！現實鬼有咁多浪漫咩！
註：今次筆者因為要揾資料，先發覺當年《不朽真情》男主角Ethan Hawke已經變成老坑，女主角Winona Ryder偷嘢事件後半失蹤。最估唔到係配角Ben Stiller《翻生侏羅紀》宜家已經成為一缐笑匠。攪到重睇呢套戲嘅時候投入度大減，你都咪話犧牲唔大。
