《哥斯拉》──哥斯拉唔係怪獸，佢係大俠！

文／第一粗人

1998年，美國荷里活第一次將日本怪戰之王《哥斯拉》拍成美版，結果係鬼佬整壽司，食你唔死都笑死你。到左十六年後嘅今日，真正嘅《哥斯拉》終於正式登陸美國。1998年美版《哥斯拉》唔被粉絲認同嘅原因係：當年嘅美國製作團隊本身就不接受哥斯拉嘅造型同埋故事，私自改變哥斯拉嘅設定，令到一隻本來似暴龍又會吸食輻射嘅史前大怪物，變成一隻因為受左輻射影響所以突變嘅大蜥蜴。呢隻大蜥蜴個口唔會噴死光已經大鑊啦！最後仲俾人類成功殺死，真係吹脹！無可否認，當年的製作團隊係想食住《侏羅紀公園》系列嘅尾水，用災難片黎包裝《哥斯拉》，所以失敗係可以預見嘅！因為佢哋忽略左一個最重要嘅地方，就係哥斯拉唔係怪獸，佢係大俠！

今次2014版《哥斯拉》搵左Gareth Edwards做導演，2010年嘅時候佢憑小成本製作電影《怪獸》（Monsters）一鳴驚人。今次導演好聰明咁用番哥斯拉嘅舊設定：佢係史前怪物，存在於人類仲未喺地球上出現之前，靠吸食幅射為生。

故事講述人類喺五十年代已經發現哥斯拉，仲多次以核試爆為名，想用核武殺死佢，最後當然係全部失敗！之後，各國聯合開發「君主計畫」用黎防範呢隻史前巨怪。但參與「君主計畫」嘅學者芹澤市朗（渡邊謙主演）喺菲律賓發現蟲形怪獸「穆透」的石化卵囊，搞到後來雌雄穆透大鬧地球。人類嘅武器根本對抗唔到佢哋，喺絕望之下，哥斯拉出手喇！

今次由宣傳到怪獸造型，本人都覺得非常成功。當初宣傳海報一出，只係見到哥斯拉嘅背影，手法真高！因為喺美國市場未必人人接受到哥斯拉呢個簡陋及充滿日本特色風釆嘅造型。如果用哥斯拉嘅正面做海報，怕會俾人一種低成本製作嘅感覺。

 《哥斯拉》2014宣傳海報

本人記得當年港產片都有呢種高手，佢就係麥當雄先生。1991年麥當雄先生製作完電影《跛豪》，當時《跛豪》嘅宣傳海報只係用一個呂良偉先生揸住柺杖嘅背影。麥當雄先生覺得當年呂良偉先生嘅電視感太強，會令大家對呢部戲嘅電影感覺大大減弱，而且《跛豪》呢個傳奇人物已經係最大嘅買點，所以喺海報唔出「呂良偉」先生個樣。後黎証實呢個宣傳計畫係極成功嘅！《跛豪》一上畫就大買。跟住徐克導演《黃飛鴻》第一集上映嘅時候，宣傳海報都無用李連杰先生個樣，又係浄剪影，我想可能係當年李連杰先生個樣太大陸味！當然《黃飛鴻》又係大成功啦！仲拍成系列同埋紅左李連杰先生添！

講番《哥斯拉》套戲嘅怪獸造型，哥斯拉大部份跟足傳統，其餘兩隻怪獸就設計得極簡單，你可以見到係多個幾何立體砌出黎，唔係太流線型。如果放喺第二套荷里活製作一定俾人叫回水。但係放喺做哥斯拉對手呢個位，絕對平衡番哥斯拉嘅笨拙樣。劇組亦都非常聰明地設計第一隻出場怪獸會飛，發揮到遮醜嘅作用。

其實今次嘅《哥斯拉》真係幾好睇，導演拍出哥斯拉嘅大俠感覺。當人類最厲害嘅核武同電子科技都唔可以對付到穆透怪獸嘅時候，哥斯拉受到自然呼召出來獵殺穆透。導演編排到哥斯拉好似一個寂寞刺客咁，不問報酬，不顧千里路程去到美國打怪。其間就算人類喺金門橋用大火力武器轟佢，佢都無還手或報復性咁屠殺人類，只係默默前進去完成任務。到最後主角要防止核爆，所以跑去海邊運走核彈頭，呢刻哥斯拉有一個喺煙霧中回頭同主角對望嘅鏡頭，超有識英雄重英雄嘅感覺！到最後哥斯拉殺敗穆透後重傷倒地，大家以為哥斯拉已經死左，喺呢刻，哥斯拉突然打開眼，慢慢起身走番落大海度，絕對無要大家嘅道謝。本人睇住哥斯拉個背影慢慢行落海，心裡面竟然響起鄭少秋先生嘅《楚留香》電視劇主題曲：「千山我獨行不必相送，獨行！不必相送……」真係大俠到冇朋友！