《皮下之慌》──令人有置身惡夢的感覺

今次講下呢套《皮下之慌》（Under the Skin），唔好以為我淨係睇商業片呀，其實有時都好有深度！（事實係：見到套戲簡介係講外星人，以為係科幻片。點知……）最緊要係有「復仇者聯盟」裏面演「黑寡婦」既施嘉莉祖安遜（Scarlett Johansson）當中多場全裸演。（美國隊長都未睇過「黑寡婦」唔著衫啦！真係唔睇就笨！）

 科幻藝術片: 科幻得來帶點藝術，華麗中帶點迷幻。

記得《華爾街之狼》（The Wolf of Wall Street）其中一場戲裡面：里安納度‧迪卡比奧（Leonardo DiCaprio）講解食精神科藥物「忽得」既感覺。佢話食完之後你會好眼訓，如果你頂住唔訓著既話，睡意一過你就會進入一個迷幻境 ; 其實情況同睇呢套《皮下之慌》都幾似。

套戲由拍MTV出身既英國導演祖納芬基里沙（Jonathan Glazer）執導，但係戲入面你唔會見到有強勁節奏感既分鏡，相反今次導演用左大量長鏡黎拍攝。（長鏡唔係話佢拍電影部攝影機既鏡頭長短，係話佢每個鏡頭都佔好長時間，即係好耐都唔cut shot。）好處係可以仔細咁睇清楚演員們既演技，同埋帶你既情緒慢慢走入電影裏面。而壞處就係悶、好悶、悶到呆左、悶到癲左。

講返故事，劇情極簡單，外星人落左黎地球，用一個美女身體誘惑同獵食人類，最後想了解多少少人類既時候就被人殺左。（嘩！咁既故事，如果係港產片俾王晶或者蔡瀾拍就發達喇！）導演玩藝術，如果要講呢套戲既意識形態或者深層意義既話，真係吹到環繞地球幾個圈都未吹完。淺白黎講：係大自然生態裏面，各種動物都有唔同既獵食能力。導演用左捕蟲草咁既食肉植物特性，套用係外星人身上。捕獵者用美麗外貌吸引獵物，當獵物一步一步走入陷阱既時候，會不知不覺間被消化溶液溶解吸收，只留低一塊薄薄既皮膚。

 一個由人變皮既鏡頭，非常亮麗、非常震撼！

不過，劇情簡單又唔代表套戲製作簡單，導演用左一個全黑既環境黎表現呢個捕獵陷阱，當雙方一邊脫去衣服，慢慢行入陷阱既時候，畫面出現左一個行內稱之為「鋼琴面倒影」既反射面，跟住就見到獵物一路行一路沉入黑色溶液裡面，畫面絕對簡潔漂亮。但係簡潔不等於簡單，要拍攝出呢個效果係需要極高技巧既燈光技術，同埋非常複雜既電腦後期特效合成，真正做到平凡之中見高超。

 傳說中的「鋼琴面倒影」拍攝現場，地板反射如湖中倒影，真正高手之作。

套戲去到中段劇情已略見重複，加上似走音又非走音既奇怪配樂，睇到好似入左無盡惡夢之中。終於劇情轉接位出現既女外星人遇上一個外貌古怪、有神經纖維瘤既病人，忽然大發善心無殺佢。放過獵物之後居然轉移想進一步了解人類，如此劇情就好比一個捕蛇獵人想走去同條蛇做朋友，到最後梗係活生生俾條蛇咬死啦！亦係咁大家先有機會夢醒完場。

 全靠呢位病人，先令劇情得以有所起伏……唔係大家都可以同「黑寡婦」發番個夢先 !

整體上套戲好迷幻，大量華麗既廣角鏡頭同黑暗空間對比，再加上怪異非常既配樂。每一個範疇都可以夠你講足半日。如果你真係唔怕眼訓話千祈唔好錯過。