映畫手民 Cinezen
文／第一粗人
睇電影同睇波有幾分相似，一場好睇嘅球賽，最好就緊係各有攻守、互有入球啦。如果成場波雙方球員都喺度行黎行去，到最後入得一球或者平手嘅話，咁就真係搵鬼睇喇！其實呢個道理放喺商業電影製作都係一樣。
林德祿導演喺1993年用香港廉政公署成立做題材，拍成《廉政第一擊》。狄龍大鬥李子雄，正邪鬥法到日月無光。雖然當年套戲俾本人嘅感覺似食緊《跛豪》同《五億探長雷洛傳》嗰類傳記片嘅尾水，但係到宜家睇番都仲幾好睇，可以話係一套唔錯嘅商業片。
事隔21年，林德祿導演再次用廉政做題材，推出呢套《Z風暴》。故事內容用香港做背景，外國金融大鱷想將一個名為Z基金嘅項目，放喺香港上巿。當然，呢個基金係一個騙局啦。外國金融大鱷仲收買左港府前高官，話如果Z基金順利上市嘅話，香港政府嘅「關懷基金」就會將用嚟扶貧嘅150億港元注入作為投資。面對咁大嘅騙案，廉政公署首席調查員古天樂，梗係要同成班貪污集團鬥法啦。
今次劇本由林德祿導演親自操刀，無可否認，《Z風暴》喺合理性方面遠遠勝過《廉政第一擊》，林導演更加利用到近期大熱嘅官商勾結話題放落劇本度，睇得出係想要吸引嗰班套套戲都話好多政治意識嘅傳媒同觀眾。點知呢個世界好多時就係，你越刻意，就越冇人講。
《Z風暴》劇照
雖然已經用到羅冠蘭嚟扮演女高官，羅冠蘭亦都演得相當出色，可以話觀眾一睇就知佢扮邊個，但係話題性始終不太大。其他演員就不過不失啦，古天樂用番一般古天樂嘅演法；林家楝就十年如一日咁大閙廣昌隆；陳靜就更加吃力不討好，因為觀眾好難相信陳小姐會好似佢演果個角色咁天真同儍。幸好戲裡面其他前輩演員都非常搶鏡，鵬哥盧海鵬演技唔駛講啦！最難得係智叔廖啓智，雖然得兩場戲，但係都盡曬力去包裝自己嘅角色，真真正正絕不欺場。綜合黎講，演員嘅演出尚算合格。
講左咁耐，更係要用《Z風暴》嚟講番本人嘅球賽同電影關係理論啦！個理論其實好簡單，就係劇情嘅正邪對立位要分明，跟住要互有攻守嚟帶動觀眾情緒。而《Z風暴》就好似一場雙方無乜攻守嘅球賽，一個人帶住個波上，話入波就入波，配角話紅牌就紅牌。前半套戲古天樂有古天樂查案，王敏德有王敏德殺証人，到鵬哥應承做証人先至將雙方嘅沖突位強化。最後雖然所有劇情合情合理，但係就欠缺左壓迫感同緊張性。
相比起當年《廉政第一擊》嘅劇情，狄龍同李子雄角色設定忠奸分明，雙方攻守緊密。狄龍搵到証人指証李子雄，李子雄就派人殺証人同狄龍手下許志安；狄龍成立廉政公署對付李子雄，李子雄就殺死任達華嚟警告狄龍……到最後雖然係例牌嘅邪不能勝正，但係對觀眾嚟講絶對係緊張刺激。
如果話20幾年前嘅戲你未必睇過，又怕上YouTube 搵嘅話，可以俾個近少少嘅例子大家。不過唔係電影，係前果排大熱日劇《半澤直樹》，喺套劇入面觀眾可以見到半澤俾上司銀行行長迫害，半澤要搵方法還擊，一攻一守，各有射球。到最後梗係行長輸，半澤贏啦！大家可以見到，整套劇都係用球賽攻守理論。最後劇集成為日本嘅收視神話，仲紅透亞洲添！
最後，對《Z風暴》嘅感覺只有一個比喻，就係似飲蒸餾水，好難搵到錯處，但係淡而無味。
