映畫手民 Cinezen
文／第一粗人
入場睇完《竊聽風雲3》，幾失望！故事結構簡單，兩班人喺度內鬥，鬥完後死嘅死，坐監嘅坐監。最大鑊係成套戲無高潮位！完全無一個位可以令人有緊張感覺。就算去到尾炒大鑊，都係話嚟就嚟，炒完收場。雖然好多人話套戲好有社會意識，有好多仲讚不絕口話好睇，但係對本人來講，俾左七十大元入戲院睇商業片，起碼你唔好悶親我同當我低能先！我要睇社會意識嘅話，唔好星期日開部電視睇城市論壇？！
麥兆輝同莊文強今次真係太睇小觀眾喇！以為用新界丁權做綽頭，再加上各主角個鄉霸造型就叫好戲，真係中晒嗰句「一蟹不如一蟹」。上集《竊聽2》，本人已經覺得麻麻地，劇情講成班七十年代股票金牌經紀，因為鐘意一齊玩「鬥地主」，所以成立「地主會」。大佬呀！「鬥地主」發明於九十年代中國大陸，七十至九十年代香港賭啤牌大多數都係玩「鋤大D」或「話事啤」，為左配合大陸市場就話玩「鬥地主」，真係笑鬼死人，好在整體劇本處理都有高低起伏。角色上都叫忠奸分明。更勝在有一班老戲骨頂住，所以都叫睇得過。
其實當時睇《竊聽2》嘅時候，已經好強烈覺得麥兆輝同莊文強喺向經典電視劇《大時代》致敬！估唔到今次《竊聽3》仲厲害，搵套幾十年前嘅電視劇《風雲》嚟玩！雖然有時抄下舊電視劇嘅概念無傷大雅，但係都唔好拍到一陣番梘味（肥皂劇味）。編導為左配合個戲名，所以講到戲入面竊聽技術無所不能咁，閉路電視畫面話放大就放大，你估閉路電視都好似你拍戲咁，拍超高清畫面呀？吳彥祖一條友用半年時間，喺對方成間公司乜野位都裝曬偷窺鏡頭，真係FBI都要搵佢指導下。如果有咁好嘅竊聽技術，去做特務啦。或者走去竊聽李家誠或李兆基級數嘅富豪，搵佢哋生活上秘密黎屈佢錢咪仲快！駛鬼炒新界地呀？！
仲有，套戲無左上集咁重視前輩級演員，本人最想睇嘅曾江同吳孟達佔戲好小。反而放好多戲落周迅同黃磊度，唔通平衡市場真係咁重要？
成套戲最寫實嘅劇情都算係劉青雲落深水埗賣舊電腦舖，搵反竊聽專家谷德昭幫手。証明喺編劇心目中，深水埗係幾咁臥虎藏龍。深水埗吸引力絕對極大，或者編劇用左太多時間行深水埗，所以忽略左編排劇本嘅推進。
劇本嘅推進，大多數都係由鬥爭開始。當鬥爭越明顯，觀眾越易投入。可惜《竊聽3》好明顯係眼高手低，葉璇個角色可以話無厘頭到極！曾江要將公司上市，目的係要將權力留俾個女葉璇，但係一嘈交，葉璇就唔俾藥曾江食嚟害死佢，財產係唔係都係留俾你，你仲攪咁多做乜？一時就表現喺事業上好有野心，一時又話叫古天樂為個BB報仇，同劉青雲班人嘅鬥爭仲薄弱，跟本就唔駛鬥，正所謂各有各做，睇唔出做乜要鬥囉！係要攪到最後俾劉青雲攞到佢嘅殺人証據。攬住一齊死至安樂，發神經！
近年劇本混亂已經成為港產片一大特色，所以未算大鑊。最大鑊係相似！套套都係果班演員，雖然話市場上有賣埠價嘅男演員不出十人。但係都唔駛套套古天樂搭劉青雲掛？！你估打麻雀要對眼咩！仲要衰到陳木勝導演嘅《掃毒》唱舊歌「誓要去，入刀山」，你又走去唱「是誰令青山也變，變了俗氣的咀臉」。喺「掃毒」入面古天樂一見番張家輝就揸車互撞，喺《竊聽3》入面又整場戲揸車互撞，不過改左劉青雲撞古天樂，無限輪迴。期望下次見到張家輝撞劉青雲。
唔知幾時開始，港產片開始出現一種說法，只要擺小小政治意識落去就會收得！你可以喺《竊聽3》聽到到周迅講：「土地唔係要黎買泥買去㗎！」重要收尾講多次添！方死你唔知佢有野想表達！表達到咁明顯，感覺真係似睇日本AV時，男優不停問條女：「舒唔舒服呀!？」真係要答番呀麥兆輝同莊文強一句：「舒服晒！多謝唔該！」
嘈左咁耐，《竊聽3》都有野讚下嘅，就係宣傳喇。各演員嘅新界人造型加上一條極好嘅扮樓盤廣告預告片，就咁引左本人入場。不如學埋《寒戰》咁，搵個名人讚下套戲啦！有個行內人同本人講，當日葉劉淑儀Facebook上讚一下《寒戰》，收多幾百萬，周潤發去睇《狂舞派》都攪到套戲票房過千萬啦！《竊聽3》嘅宣傳人員可以試下架！
到最後如果要總結，本人覺得呢套野好過普通電視劇小小啦！（因為有大明星做）如果講寫實同好睇，絕對比唔上之前喺TVB播嘅《廉政行動2014》。
