《變種特攻：未來同盟戰》──系列電影好難拍！

文／第一粗人

如果你唔係《X-Men》系列嘅死硬派粉絲，無睇曬之前果六集（包括《變種特攻1-3集》、《變種特攻──第一戰》、《變種特攻──金剛狼》和《金剛狼──武士之戰》）又想入場睇呢套《變種特攻：未來同盟戰》嘅話，最好上網重溫同做下功課先。仲有記住千祈唔好同班死硬粉絲一齊入場睇，如果唔係實俾人笑你無知！

綜合一般觀眾對劇情嘅問題如下：

問：點解X教授（Professor X）無死到？
答：（在X-Men 3找到）片尾X教授上左個植物人身。

問：點解金剛狼（Wolverine）只係得骨爪？
答：（答案在外傳《變種特攻 -金剛狼》中可以找到）因為金剛狼被改做嘅時空係80年代，宜家故事係講越戰後，時空應該在《變種特攻──第一戰》之後，即係70年代。

純娛樂性黎睇，今集故事比較簡單，一條回到過去，改變未來嘅橋就攪掂。時空橋本人覺得絕對走唔出經典電影《未來戰士 2》（Terminator 2：Judgment Day）嘅範圍，所以對今集劇情驚喜不大。人物關係太複雜，攪到睇戲嘅時候，仲要本人喺腦海裡面翻查前6集嘅資料，先至跟得上今集劇情，都咪話唔辛苦！

雖然今集劇情老土左少少，但係都有亮點嘅！亮點就係睇各變種人點樣比超級機械人打死。電腦特技加上連場動作，真係令人目不暇給。但係電腦特技都唔係萬能嘅！好似演金剛狼嘅 Hugh Jackman 老咗，全身肌肉鬆鬆哋。演 Storm 嘅 Halle Berry 飛咗髪同老到好得人驚。CG就唔係咁幫到佢哋喇！所以証明電腦特技真係唔係萬能嘅。

睇完套戲之後出去吹水，有幾個行家喺度不停討論《X-Men》系列裡面嘅反戰意識同埋反歧視嘅中心思想，講到可以寫成篇論文咁濟。睇套漫畫改編嘅電影都可以咁學術，難為本人當年睇公仔書俾老豆打到屎忽開花，真係今時唔同往日！

唔好講咁深，《X-Men》系列用左14年、共7集嘅故事篇幅，去創造出一個屬於自己嘅空間。如果發展落去，絕對有可能超越系列王《哈利波特》嘅8集紀錄。

其實我哋香港喺50-70年代都有好成功嘅系列電影，就喺關德興師傅嘅《黃飛鴻系列》。當時製作同觀眾要求都比較簡單，所以做就左77部呢個無敵嘅數字。但係80年代後再無乜經典系列電影出現，例如《風雲》因為漫畫故事凌亂，所以只拍兩集就無以為繼，演員們（鄭伊健和郭富城）年齡又越黎越大都係問題。又好似徐克嘅新《黃飛鴻》系列，演員紅左就扭計，攪到李連杰變趙文卓！所以拍系列電影真係有一定難度！

關德興師傅《黃飛鴻系列》

總括而言，系列電影難拍主要有兩個因素：

一、開頭你要有一個比較完整同埋長篇嘅故事（最好仲要夠人氣），劇本先可以無限伸展。

二、喺長時間拍攝期間，演員會變紅或變老，最大鑊係由紅變左唔紅。

其實上述兩點喺《X-Men》系列已經睇到，記得電影公司喺《X-Men 3》推出嘅時候講：X-Men系列只係拍3集就大結局，跟住再用其他獨立角色開外傳。期間開拍左《變種特攻──第一戰》，呢野真係高招！喺故事好難再突破嘅時候，將故事時空推前30年，令到電影公司可以將好多新嘅當紅演員加入（例如：演妖后嘅 Jennifer Lawrence），令到系列更有生氣。同時又可以將以前當紅嘅重要角色，宜家人氣下滑嘅演員淡化（例如：演Storm嘅Halle Berry）。當年《X-Men》第一集Halle Berry剛做影后，大紅大紫，佔左宣傳海報中間位置，宜家嘅對比大家可以喺新一集宣傳海報見到。中間位當然喺新影后Jennifer Lawrence啦！

無可否認，《X-Men》系列其故事嘅複雜性同人物關係結構，已經去到極難控制又容易出錯嘅階段。所以你可以睇到，喺加入新演員同埋將故事時空拉闊之後，今集編劇們用一條改變未來橋黎一個重新Restart，令到將來所有新嘅劇情都會合理化。

其實《X-Men》系列將來會遇到最大嘅問題係演員老化。有邊個可以好似系列王《哈利波特》咁，11年出8集，演員由童星拍到少年？試想當Hugh Jackman七老八十時，仲點演金剛狼？或者到最後結局好似蜘蛛俠咁從新拍過囉！

題外話，其實我最有興趣想知，如果《X-Men》真係拍到77集嘅時候，Hugh Jackman會點呢？！