《惡戰》──「自然 Cult」 武打片

文/第一粗人

一套大家可能無留意嘅電影,黄精甫導演,伍允龍、安志杰、洪金寶主演嘅武打片,睇落吸引力不大,咁係咩吸引本人上網睇呢?原因好簡單,就係武術導演袁和平。

八爺(袁和平)嘅武術設計絕對係國際級,今次嘅武打場面用左好多高速拍攝(high speed),再加上CG(computer graphics)嘅幫助,絕對精彩!

讚完!講番套戲。這麼多年來,黄精甫導演真係無咩佳作,大家有印象同讚好嘅只有《福伯》。《江湖》同《阿嫂》真係唔好提啦!感覺上黃導演拍嘅戲,越多大明星,越拍得垃圾!唔知今次係咪因為無咁多大明星,所以控制場口推進同演員演出都見其心思,本人看後與同行分享觀後感時,只得一句:「好Cult。」

本人認為,世上沒有一個導演會覺得自己在拍Cult片。如果刻意去拍,那些Cult片絕對不會好看,所以好嘅Cult片係要所有劇組人員用心用力製作,但拍完出來有種那種怪怪嘅感覺,這種「自然Cult」係最高級的。

黃導演很大膽地將全片調至接近黑白色彩,應該係想拍出如《罪惡城》(Sin City)嘅感覺,但佢好似忘了Robert Rodriguez 同 Frank Miller拍Sin City時,大部分背景都是用CG合成的,所以畫面對比度和層次感成為一絕。而黃導演用的是實景,實景要在後期做黑白的話,拍攝時現場燈光的需求會大大增加,否則很難做出強烈對比度及層次感,當拍大wide shot時更難控制。黃導演卻不懼難處,用平常拍電影的燈光拍,拍完後期褪色,所以層次感不強,對比度高不成低不就的,總知就是拍出一種怪怪的感覺。

故事編排是成功的,一個小子到上海搵食,遇到黑社會大哥,變成好友,打打打打打打,日本侵華,殺黑社會大哥,小子報仇,打打打打打,殺日本人。

你一定會問咁嘅劇情邊算成功呀?答案就在伍允龍的角色身上!

伍允龍在戲裡演馬永貞,一代武術家。編劇好玩嘢咁將周星馳在新精武門裡面的絕橋重用一次。當我聽到伍允龍講佢隻右手好大力,一拳打死隻牛,真係笑咗!更絕的是,佢老母要佢帶住隻手鈪,重要係好大隻,中間有個噹噹果種,話怕佢太大力,好易會打死人!

這就是故事編排的成功!佢果隻牛咁大嘅手鈪,正正就是吸引我睇曬全套片之處。套得呢隻手鈪就一定係最後打爆佢,好似睇三級片點都要等到床上戲一樣,爆鈪就是成套戲嘅性高潮!比你都想睇下爆鈪果拳有幾勁啦!

套戲其他Cult位真係多不勝數,你可以見到日本殺手用嘅暗器,竟然係大到好似風扇葉咁嘅飛標!真係唔知佢點帶係身!日本人要殺安志杰,收買曬佢身邊所有人。咁易收買到開頭駛鬼叫佢合作咩!

最Cult爆嘅係伍允龍最後一個人上去殺曬斧頭幫同日本人,開頭我都睇到「嘩!唔係麻!」點知再睇一次先知武術設計嘅勁。原來伍允龍左手打到嘅嘍囉會起番身再打,右手打到嘅即死!細心到吖!當然大家梗係唔會用手槍呢啲高科技嘅嘢啦!

到最後爆鈪完畢,伍允龍去向警方自首,殺左成百幾人再自首,幾警世呀!唔知佢開頭有無去報定案呢?

最後如果你仲要問,咁套野好唔好睇?我會答你:電影唔係乜嘢高深藝術,俾到咁多娛樂你,仲唔快手淥個杯麵上網睇?

Leave a Reply

Your email address will not be published. Required fields are marked *

*